Canticum Canticorum (Song of Songs) 2 :: Latin Vulgate (VUL)

Sng 2:1ego flos campi et lilium convallium

Sng 2:2sicut lilium inter spinas sic amica mea inter filias

Sng 2:3sicut malum inter ligna silvarum sic dilectus meus inter filios sub umbra illius quam desideraveram sedi et fructus eius dulcis gutturi meo

Sng 2:4

Sng 2:4introduxit me in cellam vinariam ordinavit in me caritatem

Sng 2:5

Sng 2:5fulcite me floribus stipate me malis quia amore langueo

Sng 2:6

Sng 2:6leva eius sub capite meo et dextera illius amplexabitur me

Sng 2:7

Sng 2:7adiuro vos filiae Hierusalem per capreas cervosque camporum ne suscitetis neque evigilare faciatis dilectam quoadusque ipsa velit

Sng 2:8

Sng 2:8vox dilecti mei ecce iste venit saliens in montibus transiliens colles

Sng 2:9

Sng 2:9similis est dilectus meus capreae hinuloque cervorum en ipse stat post parietem nostrum despiciens per fenestras prospiciens per cancellos

Sng 2:10

Sng 2:10et dilectus meus loquitur mihi surge propera amica mea formonsa mea et veni

Sng 2:11

Sng 2:11iam enim hiemps transiit imber abiit et recessit

Sng 2:12

Sng 2:12flores apparuerunt in terra tempus putationis advenit vox turturis audita est in terra nostra

Sng 2:13

Sng 2:13ficus protulit grossos suos vineae florent dederunt odorem surge amica mea speciosa mea et veni

Sng 2:14

Sng 2:14columba mea in foraminibus petrae in caverna maceriae ostende mihi faciem tuam sonet vox tua in auribus meis vox enim tua dulcis et facies tua decora

Sng 2:15

Sng 2:15capite nobis vulpes vulpes parvulas quae demoliuntur vineas nam vinea nostra floruit

Sng 2:16

Sng 2:16dilectus meus mihi et ego illi qui pascitur inter lilia

Sng 2:17

Sng 2:17donec adspiret dies et inclinentur umbrae revertere similis esto dilecte mi capreae aut hinulo cervorum super montes Bether

The Latin Vulgate was translated from the original languages into Latin by Jerome in A.D. 405. For over a millennium, it remained as the preferred translation of the church. This version of the Bible is in the public domain.