Judices (Judges) 10 :: Latin Vulgate (VUL)

Jdg 10:1

Jdg 10:1post Abimelech surrexit dux in Israhel Thola filius Phoa patrui Abimelech vir de Isachar qui habitavit in Sanir montis Ephraim

Jdg 10:2

Jdg 10:2et iudicavit Israhel viginti et tribus annis mortuusque ac sepultus est in Sanir

Jdg 10:3

Jdg 10:3huic successit Iair Galaadites qui iudicavit Israhel per viginti et duos annos

Jdg 10:4

Jdg 10:4habens triginta filios sedentes super triginta pullos asinarum et principes triginta civitatum quae ex nomine eius appellatae sunt Avothiair id est oppida Iair usque in praesentem diem in terra Galaad

Jdg 10:5

Jdg 10:5mortuusque est Iair ac sepultus in loco cui est vocabulum Camon

Jdg 10:6

Jdg 10:6filii autem Israhel peccatis veteribus iungentes nova fecerunt malum in conspectu Domini et servierunt idolis Baalim et Astharoth et diis Syriae ac Sidonis et Moab et filiorum Ammon et Philisthim dimiseruntque Dominum et non colebant eum

Jdg 10:7

Jdg 10:7contra quos iratus tradidit eos in manu Philisthim et filiorum Ammon

Jdg 10:8

Jdg 10:8adflictique sunt et vehementer oppressi per annos decem et octo omnes qui habitabant trans Iordanem in terra Amorrei quae est in Galaad

Jdg 10:9

Jdg 10:9in tantum ut filii Ammon Iordane transmisso vastarent Iudam et Beniamin et Ephraim adflictusque est Israhel nimis

Jdg 10:10

Jdg 10:10et clamantes ad Dominum dixerunt peccavimus tibi quia dereliquimus Deum nostrum et servivimus Baalim

Jdg 10:11

Jdg 10:11quibus locutus est Dominus numquid non Aegyptii et Amorrei filiique Ammon et Philisthim

Jdg 10:12

Jdg 10:12Sidonii quoque et Amalech et Chanaan oppresserunt vos et clamastis ad me et erui vos de manu eorum

Jdg 10:13

Jdg 10:13et tamen reliquistis me et coluistis deos alienos idcirco non addam ut ultra vos liberem

Jdg 10:14

Jdg 10:14ite et invocate deos quos elegistis ipsi vos liberent in tempore angustiae

Jdg 10:15

Jdg 10:15dixeruntque filii Israhel ad Dominum peccavimus redde tu nobis quicquid tibi placet tantum nunc libera nos

Jdg 10:16

Jdg 10:16quae dicentes omnia de finibus suis alienorum deorum idola proiecerunt et servierunt Deo qui doluit super miseriis eorum

Jdg 10:17

Jdg 10:17itaque filii Ammon conclamantes in Galaad fixere tentoria contra quos congregati filii Israhel in Maspha castrametati sunt

Jdg 10:18

Jdg 10:18dixeruntque principes Galaad singuli ad proximos suos qui primus e nobis contra filios Ammon coeperit dimicare erit dux populi Galaad

The Latin Vulgate was translated from the original languages into Latin by Jerome in A.D. 405. For over a millennium, it remained as the preferred translation of the church. This version of the Bible is in the public domain.