Deuteronomium (Deuteronomy) 2 (VUL) - profectique inde venimus in solitudinem

¶

Deu 2:1profectique inde venimus in solitudinem quae ducit ad mare Rubrum sicut mihi dixerat Dominus et circumivimus montem Seir longo tempore

Deu 2:2

¶

Deu 2:2dixitque Dominus ad me

Deu 2:3

Deu 2:3sufficit vobis circumire montem istum ite contra aquilonem

Deu 2:4

Deu 2:4et populo praecipe dicens transibitis per terminos fratrum vestrorum filiorum Esau qui habitant in Seir et timebunt vos

Deu 2:5

Deu 2:5videte ergo diligenter ne moveamini contra eos neque enim dabo vobis de terra eorum quantum potest unius pedis calcare vestigium quia in possessionem Esau dedi montem Seir

Deu 2:6

Deu 2:6cibos emetis ab eis pecunia et comedetis aquam emptam haurietis et bibetis

Deu 2:7

¶

Deu 2:7Dominus Deus tuus benedixit tibi in omni opere manuum tuarum novit iter tuum quomodo transieris solitudinem hanc magnam per quadraginta annos habitans tecum Dominus Deus tuus et nihil tibi defuit

Deu 2:8

¶

Deu 2:8cumque transissemus fratres nostros filios Esau qui habitabant in Seir per viam campestrem de Helath et de Asiongaber venimus ad iter quod ducit in desertum Moab

Deu 2:9

Deu 2:9dixitque Dominus ad me non pugnes contra Moabitas nec ineas adversum eos proelium non enim dabo tibi quicquam de terra eorum quia filiis Loth tradidi Ar in possessionem

Deu 2:10

¶

Deu 2:10Emim primi fuerunt habitatores eius populus magnus et validus et tam excelsus ut de Enacim stirpe

Deu 2:11

Deu 2:11quasi gigantes crederentur et essent similes filiorum Enacim denique Moabitae appellant eos Emim

Deu 2:12

Deu 2:12in Seir autem prius habitaverunt Horim quibus expulsis atque deletis habitaverunt filii Esau sicut fecit Israhel in terra possessionis suae quam dedit ei Dominus

Deu 2:13

¶

Deu 2:13surgentes ergo ut transiremus torrentem Zared venimus ad eum

Deu 2:14

Deu 2:14tempus autem quo ambulavimus de Cadesbarne usque ad transitum torrentis Zared triginta octo annorum fuit donec consumeretur omnis generatio hominum bellatorum de castris sicut iuraverat Dominus

Deu 2:15

Deu 2:15cuius manus fuit adversum eos ut interirent de castrorum medio

Deu 2:16

¶

Deu 2:16postquam autem universi ceciderunt pugnatores

Deu 2:17

Deu 2:17locutus est Dominus ad me dicens

Deu 2:18

Deu 2:18tu transibis hodie terminos Moab urbem nomine Ar

Deu 2:19

Deu 2:19et accedens in vicina filiorum Ammon cave ne pugnes contra eos nec movearis ad proelium non enim dabo tibi de terra filiorum Ammon quia filiis Loth dedi eam in possessionem

Deu 2:20

¶

Deu 2:20terra gigantum reputata est et in ipsa olim habitaverunt gigantes quos Ammanitae vocant Zomzommim

Deu 2:21

Deu 2:21populus magnus et multus et procerae longitudinis sicut Enacim quos delevit Dominus a facie eorum et fecit illos habitare pro eis

Deu 2:22

Deu 2:22sicut fecerat filiis Esau qui habitant in Seir delens Horreos et terram eorum illis tradens quam possident usque in praesens

Deu 2:23

Deu 2:23Eveos quoque qui habitabant in Aserim usque Gazam Cappadoces expulerunt qui egressi de Cappadocia deleverunt eos et habitaverunt pro illis

Deu 2:24

¶

Deu 2:24surgite et transite torrentem Arnon ecce tradidi in manu tua Seon regem Esebon Amorreum et terram eius incipe possidere et committe adversum eum proelium

Deu 2:25

Deu 2:25hodie incipiam mittere terrorem atque formidinem tuam in populos qui habitant sub omni caelo ut audito nomine tuo paveant et in morem parturientium contremescant et dolore teneantur

Deu 2:26

¶

Deu 2:26misi ergo nuntios de solitudine Cademoth ad Seon regem Esebon verbis pacificis dicens

Deu 2:27

Deu 2:27transibimus per terram tuam publica gradiemur via non declinabimus neque ad dextram neque ad sinistram

Deu 2:28

Deu 2:28alimenta pretio vende nobis ut vescamur aquam pecunia tribue et sic bibemus tantum est ut nobis concedas transitum

Deu 2:29

Deu 2:29sicut fecerunt filii Esau qui habitant in Seir et Moabitae qui morantur in Ar donec veniamus ad Iordanem et transeamus in terram quam Dominus Deus noster daturus est nobis

Deu 2:30

¶

Deu 2:30noluitque Seon rex Esebon dare nobis transitum quia induraverat Dominus Deus tuus spiritum eius et obfirmaverat cor illius ut traderetur in manus tuas sicut nunc vides

Deu 2:31

¶

Deu 2:31dixitque Dominus ad me ecce coepi tradere tibi Seon et terram eius incipe possidere eam

Deu 2:32

Deu 2:32egressusque est Seon obviam nobis cum omni populo suo ad proelium in Iesa

Deu 2:33

Deu 2:33et tradidit eum Dominus Deus noster nobis percussimusque eum cum filiis et omni populo suo

Deu 2:34

Deu 2:34cunctasque urbes in tempore illo cepimus interfectis habitatoribus earum viris ac mulieribus et parvulis non reliquimus in eis quicquam

Deu 2:35

Deu 2:35absque iumentis quae in partem venere praedantium et spoliis urbium quas cepimus

Deu 2:36

Deu 2:36ab Aroer quae est super ripam torrentis Arnon oppido quod in valle situm est usque Galaad non fuit vicus et civitas quae nostras effugeret manus omnes tradidit Dominus Deus noster nobis

Deu 2:37

Deu 2:37absque terra filiorum Ammon ad quam non accessimus et cunctis quae adiacent torrenti Ieboc et urbibus montanis universisque locis a quibus nos prohibuit Dominus Deus noster

Deuteronomium (Deuteronomy) 2 :: Latin Vulgate (VUL)